O proxecto Voz Natura é un programa de educación medioambiental da Voz de Galicia que busca concienciar e implicar á comunidade escolar de Galicia na recuperación e defensa da natureza. Dende o ano 1997 levan desenvolvido máis de 4000 proxectos coa participación de máis de 700.000 estudantes e 33.000 profesores.
O colexio Francisco Lopez Estrada leva xa varios anos participando neste proxecto e para este ano 2018 levan adiante varias iniciativas para dar a coñecer a biodiversidade e patrimonio do Río Sor.
Sentímonos moi agradecidos pola oportunidade que nos dan á asociación Nordés de colaborar en dito proxecto e preparamos unha xornada que constou de dúas partes diferenciadas.
O xoves 5 de abril do 2018 saímos ás dez da mañá camiño da Serra da Coriscada, onde nos agardaba Eva Castro, arqueóloga e técnica en centros de interpretación e museos do Concello de Ortigueira. Alí, dende o Forno dos Mouros, puidemos ollar as espectaculares vistas que nos ofrece ese marco natural.
Grazas aos seus coñecementos os rapaces, e tamén os adultos, aprendimos a diferenciar as mámoas. Do mesmo xeito, Eva ilustrounos sobre os enterramentos que se facían en épocas tan lonxanas coma o Neolítico, o seu valor simbólico, como se facían, e as curiosidades que rodeaban o mundo do alén.
Logo dun pequeno descanso para repoñer folgos, achegámonos a un tramo do Camiño dos Arrieiros, esa antiga ruta que ten máis de 5000 anos e que transcorre dende As Pontes ata Estaca de Bares. Soubemos dos diferentes usos que ese camiño tivo ao longo de tan extensa cronoloxía como o tráfico de mercadurías ou vía de comunicación entre as terras de ao pé do mar ata as alturas dos montes da Serra da Faladora, camiño que vai marcado polas case 100 mámoas catalogadas polo prestixioso arqueólogo do século pasado, Federico Maciñeira.
Xa pola tarde, apois dun bo xantar tivemos a oportunidade de desfrutar da visita ao Museo Etnográfico de Meixido.
O seu creador, Narciso Luaces, fixo as delicias da rapazada ensinándolles tódalas maravillas que ese museo garda grazas ao incansable traballo de formiga que Narciso leva facendo ao longo de moitos anos.
Ver as caras de abraio dos nenos cando el lles daba explicacións sobre os usos das diferentes ferramentas, hoxe esquencidas por todos, foi unha experiencia entrañable ao tempo que enriquecedora.
Foi sen dúbida unha xornada chea de satisfaccións, vai dende aquí o noso agradecemento ao profesorado do colexio Francisco López Estrada por ofrecernos a posibilidade de participar neste proxecto. Grazas a Vanesa Trevín e Eva Castro por acudir á nosa chamada para transmitir os seus coñecementos sobre o campo de mámoas da Coriscada e o Camiño dos Arrieiros, tamén o noso agradecemento a Narciso Luaces por abrirnos as portas do seu museo e deleitarnos con toda a sabiduria que comparteu con nós.
E finalmente agradecerlle aos alumnos e alumnas do colexio cos que disfrutamos dunha xornada que quedará na lembranza de todos e todas.
“Cando tomamos a decisión de irmos a Cuba nas nosas vacacións, desbotando outras propostas, un nome veu á miña cabeza: Lino Novás Calvo…
Para quen non o saiba, e a estas alturas non o teña buscado no “Google”, Lino Novás Calvo naceu e viviu nas Grañas do Sor (1903 – 1912), de onde emigrou para Cuba, onde viviu ata a súa saída do país caribeño pouco tempo despois da chegada da Revolución, sendo unha das grandes figuras da literatura cubana e, por extensión, hispanoamericana, ainda que non teña o renome doutros escritores como García Márquez, Vargas Llosa ou Cabrera Infante… ao peor porque foi precursor de todos eles.
Foi por iso que, xunto coa idea de facer a visita ao panteón da Unión Mañonesa, houbo outra que se asentou na nosa cabeza: atopar algún exemplar das súas obras nunha edición cubana. Sería complicado ou sinxelo?. Xa vos imos contando se o conseguimos, pero será en próximas entregas destas crónicas.
