As pegadas da Historia en San Adrián de Veiga

San Adrián EME DEF.

Din os refraneiros que “o mes de maio pasa como un raio” e para chegar a tempo de gozalo, Nordés ofrece un camiño alternativo, para recrearnos nas lendas e na historia dun lugar concreto: San Adrián de Veiga.

MAPA SAN ADRIÁN

Para chegar: Tanto dende Ferrol como dende Ortigueira, pola estrada AC- 862 ata Ponte Mera, desvío dirección Cariño (DP-6121). O sinal de “Centro Social” atópase na estrada principal, enriba dun sinal de paso de peatóns.

Nesta parroquia do concello de Ortigueira, situada xusto no límite co concello de Cariño, temos á nosa disposición un patrimonio material moi rico e representativo de Galicia: mámoas, castros, castelos.. Os nosos oídos poderán escoitar con deleite as lendas da zona e os nosos ollos marabillaranse coa paisaxe da zona e coas súas augas caídas nun pozo do inferno.

Este sábado 21 de maio, Nordés ofrece un roteiro didáctico para percorrer o Castelo do Casón e o Pozo do Inferno, pola mañá, para máis tarde achegarnos ao castro do Monte/Penido do Medio e as mámoas do Chao da Arada. Incluso pode que visitemos algún punto máis como as mámoas de Chiquero.

Realizaremos dita saída de campo na compaña de Vanesa Trevín, arqueóloga, e Pepe Riola, experto na historia e lendas da zona, que terá como punto de reunión dous lugares, según os intereses dos participantes: ás 10:00 h. no aparcadoiro da Alameda en Ortigueira ou ás 10:30 h. no aparcadoiro do centro social de San Adrián.

Usaremos coches para achegarnos ás inmediacións dos lugares, polo que o roteiro non ten un percorrido a pé excesivo nin complicado, pero é necesario levar roupa e calzado axeitado para unha travesía polo monte.

Nestes casos tamén é necesario recoller forzas para a tarde, por iso damos a opción de anotarse a unha comida na Casa Veiga neste mesmo pobo. O prezo é de 15€ por persoa e o menú atópase reflexado no cartel. Tedes ata o 19 de maio para apuntarvos no número de teléfono 653756454 (Ricardo), no e-mail asociacion.nordes@gmail.com ou enviando unha mensaxe á nosa conta de Facebook.

Animádevos a coñecer a vosa contorna! 

Animádevos a camiñar polas pegadas da historia con Nordés!


Máis información sobre San Adrián de Veiga na páxina web do Concello de Ortigueira: 

http://www.concellodeortigueira.com/turismo/intro2b.php?txt=rota_3&lg=cas 

Advertisements

Da Ragazzona ao pecio de Xove: arqueoloxía subacuática do Norte de Galicia.

imprimir eme 19.

O mar.
Ese mar, fonte de vida e morte. Facedor da morte en vida das que ollan entre bágoas.
O mar, anoxado e querido, prácido e salvaxe, agarimoso e brutal….
Os seus fondos reciben, ano tras ano dende hai milleiros, pegadas da actividade humana:
Restos de aparellos, de naufraxios e afundimentos. De galeras, naos, baleeiros, bous, fragatas, acoirazados, mercantes, petroleiros, arrastreiros, tarrafas, trasatlánticos…cidades mesmo.
De cando en vez, unhas pequenas e estrañas escuras figuras, de grandes ollos de vidro, achéganse a eses restos que repousan nun sono eterno que eles veñen a inquietar cos seus desprazamentos nunha actividade frenética, ó tempo que pausada, ó ritmo que marca o propio mar, que en moitas ocasións resístese a que se lle arrebate aquilo que enguliu.
Esas pequenas sombras, sempre poucas en comparanza co que o mar agocha, son as que, arriscando a vida inmersión a inmersión, detraen do leito mariño pequenas partes da Historia da Humanidade para, co resultado do seu estudo, axudar a completar os parágrafos en branco do gran libro do noso existir.
Un deses visitantes da profundidade é David Fernández Abella, arqueólogo de pé e de aleta, fundador da empresa “Argos”, adicada a realizar proxectos e intervencións tanto no ámbito terrestre como subacuático, que ten mergullado unha boa parte do mar costeiro de Galiza na procura de restos arqueolóxicos, dos cales falará o sábado 4 de xullo no salón de actos da Casa do Concello de Mañón, no Barqueiro, convidado por Nordés.
Non deixen pasar esta boa oportunidade de coñecer as historias das que o noso mar é actor e testemuña.

Xénese

Logo dun xantar na montaña mañonesa, un grupo de amigos da contorna con intereses e preocupacións semellantes polo patrimonio da Serra da Faladora, decidimos crear unha asociación que tivese na súa orixe unha liña de traballo constante, necesaria e optimista con adn galego para por medio de actividades variadas e rodeándonos de persoas cualificadas dar a coñecer tanta riqueza como a zona xeográfica que abrangue dita serra.

Ortigueira, Mañón, O Vicedo, Ourol, As Pontes e Muras; os Concellos que abrangue a Serra da  Faladora, que imos percorrendo nun sendeiro cheo de historia, arqueoloxía, medio ambiente e natureza, língua, gastronomía, música e cultura en toda a extensión da palabra.

Como punto de partida escollemos afondar na vida e obra do prestixioso arqueólogo, estudioso e historiador, nado no Barqueiro, Federico Maciñeira e Pardo de Lama. Para guiarnos polos moitos e diferentes contidos da súa biografía contamos coa imprescindible axuda do noso amigo Lois Armada Pita, veciño de Cariño, reputado arqueólogo e investigador no CSIC e doutor en Humanidades.

1

Foto 1. Lois Armada dirixíndose ó público reunido na sala de actos do Concello de Mañón.

Xuntos da man, iniciamos o camiño cunha instrutiva charla na sala de actos do Concello de Mañón, onde fomos aprendendo un pouquiño das inquedanzas e traballos de tan insigne persoeiro. A continuación achegámonos ao Camiño dos Arrieiros e ollamos algunhas das mámoas que el catalogou, fomos baixando cara o mar e escoitamos a historia das garitas de vixiancia erguidas en todo o noso litoral para informar ás autoridades das incursións corsarias do século XVIII. A seguinte parada da nosa viaxe levounos ata os restos do castro que hai onde hoxe se ubica o faro do Cabo da Estaca de Bares.

2

Foto 2. Restos do castro preto do faro de Estaca de Bares.

Logo dun xantar recuperador coas incomparables vistas do Semáforo de Bares, descendemos ata o peirao e puxemos pé no coído que tantas lendas e debates sobre a súa orixe leva ofrecéndonos ao longo dos tempos.

3

Foto 3. Explicación ao pé do coído do porto de Bares.

Camiñando de vagar pola praia da Concha, fomos ata onde se atopan os traballos arqueolóxicos feitos na Igrexa Vella onde aparecen restos óseos con cada temporal que bate nas costas de Bares procedentes dun cemiterio medieval, onde anteriormente estaba asentada unha vila romana sobre a que hai abundantes estudos e prospeccións arqueolóxicas.

4

Foto 4. Restos arqueolóxicos na contorna da Praia da Concha (Bares).

Como despedida da nosa primeira actividade tomamos unhas fotos para perpetuala na memoria, a carón da placa de mármore que lembra onde naceu o noso homenaxeado, acompañados dalgúns dos seus familiares que se embarcaron con nós nesta primeira experiencia e dun grupo de persoas que quixeron asistir á xénese de Nordés nun día dous de Febreiro de dous mil trece.

5

Foto 5. Placa conmemorativa na casa natal de Federico Maciñeira y Pardo de Lama.