Sinopse do Día dos Océanos 2016

Fai unhas semanas celebramos o Día dos Océanos cunha xornada cos colexios de Mañón e O Vicedo na praia de Esteiro (Concello de Mañón). Hoxe, traemos un relato fotográfico do acontecido.

A xornada comezou de forma diferente para uns e outros: mentres o colexio do Vicedo xogaba na praia, o de Mañón gozaba do camiño baixando cara ela.

As nenas e nenos de ambos colexios escoitaron a primeira charla de Antonio Martínez sobre os porques da acumulación de plásticos no medio mariño, os problemas que presenta e os xeitos máis simples para detelo.

A charla serviu como introducción para a limpeza do areal, que se realizou en grupos de idade acompañados polos profesores e os voluntarios de Nordés.

Uns 45 min despois, estos foron os resultados:

 

30 bolsas cheas de refugallos abriron a segunda charla de Antonio Martínez, centrada no problema dos microplásticos.

Ao arredor destas partículas diminutas realizamos varias actividades, co fin de que os colexios puidesen visualizar e palpar o problema directamente.

As nenas e nenos, divididos en grupos de idades, recolleron area, por un lado, para cribala e conseguir atopar microplásticos.

E, por outro lado, comprobaron como os microplásticos recollidos flotaban na auga e entenderon o motivo polo cal son confundidos con alimento no medio mariño.

Ao mesmo tempo, os nenos de pre-escolar e as súas mestras realizaron un símbolo con tapas e tapóns de plástico. Recoñecedes cal é?

Exacto! O símbolo da redución de plásticos, o primeiro dos tres erres da ecoloxía que busca o desenrolo de hábitos de consumo responsable. Na seguinte fotografía, podedes ver os tres erres cos símbolos correspondentes para reducir, reutilizar e reciclar.

Un par de horas despois da chegada, as nenas e nenos recolleron os seus agasallos e…

Chegou a hora do xantar!

Para Nordés foi unha gran mañá! E agardamos que tamén o fose para os colexios.

Xornadas coma esta non serían iguais sen eles, os voluntarios!

Tamén queremos agradecer a colaboración do Concello de Mañón, de Cuarzos Industriales e dos colexios.

Advertisements

Día dos Océanos 2016

Os escolares de Mañón chegaron andando á praia de Esteiro mentres os do Vicedo xogaban e gozaban do bo tempo.

Tras a charla de Antonio Martínez Pernas sobre o problema dos plásticos no medio mariño fíxose unha recollida do lixo do areal.

Neste 2016, a xornada adicouse especialmente aos microplásticos polo que as actividades foron dirixidas cara a súa visualización tanto na area coma na auga co fin de mostrar a magnitude do problema.

As nenas e os nenos máis maiores separaron as partículas plásticas da area cunhas peneiras e puideron ver como moitas delas flotaban na auga semellando alimento. Os máis pequenos, ao mesmo tempo, fixeron un debuxo na area con material para reciclar.

Agasallos, o xantar e tempo libre na área recreativa da praia de Esteiro completaron a xornada. Pero para ver imaxes diso teredes que esperar. Máis adiante subiremos outras fotografías para que vexades o ambiente desta xornada.

Dende Nordés, queremos agradecer a colaboración de ambos colexios, do Concello de Mañón, de Protección Civil, de Cuarzos Industrais e dos voluntarios.

Xornadas cos colexios: Día dos Océanos

“Uns océanos sans, un planeta san” é o lema do Día Mundial dos Océanos, neste 2016. O ano pasado compartimos esta xornada na praia de Xilloi cos colexios do Vicedo e Mañón e todos quedamos contentos. E, por iso… Este ano decidimos repetir! As nenas e nenos do Vicedo cruzarán a ría e daranlles a benvida os do colexio de Mañón. Unha xornada de confraternización na praia de Esteiro guiada por Antonio Martínez Pernas (téc.sup. en xestión e organización dos recursos naturais) onde faremos: unha pequena charla para falar sobre o problema dos plásticos no medio mariño, enfocando a actividade cara o problema dos microplásticos. Todos xuntos limparemos a praia e mediremos a cantidade de microplásticos presentes no areal. E para rematar, tentaremos facer uns debuxos todos xuntos. Xa veredes, xa!
Queremos agradecer a colaboración ás nenas e nenos, aos mestres e directores dos colexios. Tamén ao Concello de Mañón, a Protección Civil e a Cuarzos Industriais. E, por suposto, aos voluntarios!
Por certo, se alguén está interesado en participar como voluntaria/o que se poña en contacto con nós a través de asociacion.nordes@gmail.com, no http://www.facebook.com/nordesfaladora ou no 653756454 e será benvida/o.

Precisamos xente!

Mes do medio ambiente: Día dos océanos e das plantas invasoras

Fai unhas semanas, realizamos o Proxecto Ríos, do cal daremos información en breves. Hoxe, queremos falarvos da nosa nova actividade, comprendida dentro do que denominamos “Mes do medio ambiente”.

Este venres, día 12 de xuño, conmemoraremos o Día dos Océanos e ofrecerémoslle un oco a un tema importante e que cada día está máis presente: as especies invasoras. Para isto, contaremos coa presenza dos alumnos dos colexios do Barqueiro e do Vicedo, na praia de Xilloi.

O pasado luns 8 de xuño celebrouse o Día dos Océanos, xusto tres días despois do Día Mundial do Medio Ambiente. Esta cita convertiu ao medio ambiente, dende o 1973 – ano da súa implantación-, nunha preocupación común a tódolos países, polo menos ao integrantes das Nacións Unidas. Do mesmo xeito, o Día dos Océanos celébrase dende o ano 2009 e Nordés celébrao dende o 8 de xuño, cando se realizou unha actividade na praia de Area Grande en San Román – O Vicedo.

Aquel día realizouse unha limpeza da praia logo dunha charla divulgativa a cargo de Carlos Pena e Pedro Yáñez co título de “A contaminación nos océanos e a importancia da súa protección”. Este venres, 12 de xuño, propoñémoslle ás nenas e nenos de ambos colexios un circuíto de tres estacións no que aprenderán, xunto con Antonio Pernas -técnico superior en xestión e organización de recursos naturais- e Pedro Yáñez -licenciado en Ciencias ambientais- a: valorar os nosos océanos e a valorar o perigo que existe co lixo que circula en eles, tantos para os animais como para os humanos; coñecer o concepto de ” especie exótica invasora” e poderán ver o efecto da unlla de gato –carpobrotus edulis– no sistema dunar de Xilloi. Por último e, gracias a colaboración de Sogama, contaremos co xogo xigante “Un partido polo planeta”; unha especie de Trivial que permite coñecer e promover a redución, a reutlización e o reciclaxe, incidindo na correcta separación dos refugallos e no seu posterior depósito nos diferentes contenedores a través de tres seccións diferenciadas e dinámicas, tal e como contan na súa páxina web –aquí.

Unlla de gato –carpobrotus edulis-

“Un partido polo planeta”

Tamén tentaremos facer unha limpeza simbólica da praia de Xilloi con tódolos nenos xuntos, xa que no circuíto os alumnos formarán grupos según a súa idade.

Logo pola tarde, ás 17:00 horas, contaremos cos Quinquilláns para a realización dunha obra de temática ambiental para nenas, nenos e pais. O noso obxectivo é que tódolas nenas e nenos que se xuntaron na actividade da mañá se acheguen xunto cos seus pais á Casa da Cultura do Vicedo para disfrutar dun obra centrada no respecto ao medio ambiente e ao mundo mariño, máis en concreto.

Pasarrúas que forma parte dunha representación teatral dos Quinquilláns| Orixe da fotografía: http://nova.quinquillans.com/por-que-e-salgada-a-auga-do-mar/

Os Quinquilláns son unha compañía teatral cuns 26 anos de de traxectoria onde incluén teatro familiar e para adultos tanto en interiores como na rúa, animacións, pasarrúas, etc. Deixámosvos un video que percorre todos esos anos. Unha delicia!

Achegádevos o venres 12 de xuño ás 17:00 h. cos vosos fillos á Casa da Cultura e remataremos todos xuntos un gran día de divulgación medioambiental. Esperámosvos!